БИШКЕК, 17-янв. — Sputnik. Жаза аткаруу мамлекеттик кызматынын (ЖАМК) офицери Рахат Сыдыковдун бир небереси аман калган. Ал авиакырсык болгон учурда мектепте болгон. Бул тууралуу Sputnik Кыргызстан агенттигине ЖАМКтын маалымат кызматынан кабарлашты.
Буга чейин ведомство №1 тергөө абагынын подполковнигинин уул-келини жана эки небереси Дача айылынын үстүнө кулаган учактын айынан каза табышканын маалымдаган.
ЖАМКтан кабарлашкандай, томолой жетим калган биринчи класстын окуучусун эми чоң атасы алып кетмей болду. Баланын жакындары эртең жерге берилет.
- ЖАМК офицеринин каза тапкан жакындары:
- Уулу — Азамат Дербишалиев, 33 жашта;
- Келини — Наргиза Жумакунова, 33 жашта;
- Небереси — Актан Абакиров 4 жашта;
- Небереси — Раяна Абакирова, төрт айлык ымыркай.
Эскерте кетсек, 16-январь күнү таң эрте Гонконгдон Стамбулду көздөй келе жатып, Бишкектен май куюу үчүн "Манас" аэропортуна токтомок болгон Boeing-747 учагы Дача айылынын үстүнө кулаган. Кырсыктан акыркы маалыматтар боюнча 38 кишинин көз жумганы белгилүү болду.
Каргашалуу кырсыктын чоо-жайын Sputnik Кыргызстан агенттиги даярдаган материалдан окусаңыз болот>>
