"Саймалуу-Таш" археологиялык эстелиги — ЮНЕСКОнун дүйнөлүк маданий жана жаратылыш мурастарынын тизмесине келечекте киргизилүүчү объектилердин бири. Ал эми Маданият министрлиги тарыхый эстеликтерди биринчи орунга коёт. Бул туурасында Маданият, маалымат жана туризм министрлигинин маданий мурастарды сактоо, өнүктүрүү башкармалыгынын башкы адиси Чынарбек Жолдошов тыкыр изилдөө маанилүүлүгүн жана ЮНЕСКОнун тарыхый мурастары боюнча дүйнөлүк тизмеге талапкер жай экендигин айтты.
Жакында гана коомчулукка маалым болгондон кийин Тогуз-Тородогу "Саймалуу-Таш" улуттук паркынын аймагында жайгашкан "Кылдоо" кен участогунан алтын казуу маселеси коомчулуктун талкуусуна түштү.
"Саймалуу-Таш" археологиялык эстелиги — ЮНЕСКОнун дүйнөлүк маданий жана жаратылыш мурастарынын тизмесине келечекте киргизилүүчү объектилердин бири. Ал Кыргызстандын республикалык маанидеги тарыхый, маданий эстеликтеринин мамлекеттик тизмесинен орун алган", — деди Жолдошов.
Башкы адис "Саймалуу-Таш" жайгашкан жери, ландшафты менен уникалдуу эстелик болгондуктан, тарыхый, маданий мурастарды сактоо чөйрөсүндөгү мыйзамда каралган тартипте милдеттүү түрдө корголуп, сактала тургандыгын айтты.
Жолдошов ал жерде кезегинде көмүр иштетүү боюнча маселе көтөрүлгөндө аталган министрлик каршылыгын билдиргендигин жана алар тарыхый эстеликтерди биринчи орунга коёрун кошумчалады.
