БИШКЕК, 5-дек. — Sputnik. 2016-жылдын он бир айында Кыргызстанда экстремизм жана терроризмге үгүттөгөн 21 сайттын ишмердүүлүгүнө соттун чечиминин негизинде тыюу салынып, сегиз сайттын ишмердүүлүгүн токтотуу маселеси сотто каралууда. Бул туурасында ИИМден билдиришти.
Мындан сырткары, жети сайтка юридикалык баа берүү үчүн материал Башкы прокуратурага жиберилген.
"Одноклассники.ру" социалдык тармагында 20дан ашык профиль аныкталып, жок кылынды. Мындан сырткары, ИИМдин Ыкчам талдоо башкармалыгында профилактикалык каттоодо турган атуулдардын тизмеси такталып, текшерилди", — деп билдиришти министрликтен.
2016-жылдын он бир айында интернет түйүндөрүн мониторинг кылууда экстремизм жана терроризмди пропагандалаган үч жүзгө чукул сайт табылган.
"Экстремизм жана терроризмге үгүттөгөн 270ден ашык шилтеме жана 57 сайт табылып, 68ден ашык сүрөттөр, 19дай видеоматериал жок кылынды", — деп кабарлашты мекемеден.
Маалыматтарга караганда, бүгүнкү күндө Кыргызстандын аймагында диний экстремисттик жана террордук 20 уюмдун ишмердүүлүгүнө сот тарабынан тыюу салынган.
