БИШКЕК, 1-янв. — Sputnik. Жаңы жыл майрамы белгиленгенден кийин борбордук "Ала-Тоо" аянтынан 45 кубометр таштанды чыккан. Бул дээрлик беш КамАЗга барабар экенин мэриянын маалымат кызматы билдирди.
"Борбордук аянтты тазалоо иштери түнкү саат 2.00дө башталап, таңкы бешке чейин созулду", — деп айтылат маалыматта.
"Тазалык" ишканасынын 60 кызматкери аянтты тазалаган. Ошондой эле жети атайын техника жана эки трактор тартылган.
31-декабрдын түнү "Ала-Тоо" аянтында шаар тургундары жана коноктору үчүн майрамдык иш-чаралар уюштурулган. Саат 12.00дө майрамдык салют атылып, ал сегиз мүнөткө чейин созулган. Аны көрүү үчүн миңдеген киши аянтка келишкен.
