Буга чейин "Саякбай манасчы" эл аралык фондусу "Манас" эпосун жайылтууга, манасчыларды тарбиялоого багытталган окуу курсун уюштуруп жаткандыгы тууралуу маалымат айтылган. Фондго мүчө болгон Исаков курсту уюштуруу муктаждыктан улам келип чыкканын белгиледи.
"Ушу тапта "Манас" деп кыйкырганыбыз менен керек болсо бийлик башындагылар тереңин мындай коелу, эпостогу каармандардын аттарын укканы менен өздөрүн жакшы билбейт экен. Кыргыздардын муну билбей турганы уят. Жер-жерлерди кыдырганда көрүп калып жатабыз, ак сакал карыяларыбыздын Манас тууралуу маалыматы жок. Демек, кыргыз бүгүнкү күндө Манасы жок тарбияланып жатыптыр. Мына ушул кемчиликти жоюу максатын көздөп алдык", — деди Исаков.
Аталган сабак үч багытта — манасчылык өнөр, Манас таануу жана Манас эпосун тереңдетип окуу жаатында өтүп, катышуучулардын жаш курагы чектелбейт. Манасчынын айтымында, окуу курсу эки айга созулуп, андан өткөндөргө сертификат тапшырылат.
