БИШКЕК, 26-дек. — Sputnik. Бишкек ШИИБдин Кайгуул милициясынын кызматкерлери зордуктоого шектелген жаранды кармашты. Бул тууралуу аталган мекеме билдирди.
"Милицияга 21 жаштагы кыз кайрылып, жекшембиге караган түнү 40 жаштагы киши өзүнүн Mercedes Benz унаасынан аны зордуктап салганын айткан", — деп айтылат билдирүүдө.
Маалыматта жабырлануучу шектүү киши менен ишемби күнү саат 22.00дөр чамасында таанышканы кабарланат.
"Кыз тиги кишини конокко алып барып келүүсүн өтүнгөнүн айтып берди. Шектүү аны айткан жерине жеткирип, кайра чыккыча күтүп отурган. Андан соң алар "Ала-Тоо" аянтына барып, сүрөткө түшүшкөн. Унаага отургандан кийин эркек киши кызды каршылык көрсөткөнүнө карабай зордуктап салган", — деп айтылат билдирүүдө.
Зордукталган кыз баары жайында сыяктуу түр көрсөтүп, кафеге келгенден кийин милиция чакырган. Келген тартип сакчылары кылмышка шектүү кишини кармашкан. Ал эми билдирүү милицияга 25-декабрь күнү таңкы саат 5терде түшкөн.
Учурда кармалган жаран убактылуу кармоочу жайда камакта, тергөө иштери уланып жатат.
