БИШКЕК, 26-дек. — Sputnik. Ош шаарына караштуу Озгур айылынын 100гө жакын тургуну Ачы конушунан үлүш жер катары бөлүнгөн 112 гектар кайрак жер мыйзамсыз жол менен жеке ишканаларга берилип жатканын айтып, нааразылык акциясына чыгышты. Бул тууралуу Sputnik Кыргызстан агенттигинин аймактык кабарчысы билдирди.
Маалыматка карганда, Жапалак айыл өкмөтүнө караштуу Озгур айылында жашаган 500дөй үй бүлөгө 1975-жылдары Ачы массивинен 112 гектар кайрак жер айыл чарба багытында пайдалануу үчүн берилген.
"Убагында 2300дөй адамга 3,5 сотыхтан жер бөлүнүп, менчик укугу жөнүндө күбөлүк берилген. Эми бул жерлер "Ош курулуш" жана "Түштүк курулуш" аттуу ишканаларга берилип, үй куруу үчүн бөлүнүп сатыла баштады. Биз болсо ал жерлерге күзүндө буудай эгип койгонбуз. Эгер өкмөт бул маселени тез арада карап бербесе, чыр чоң чатакка айланышы мүмкүн", — деп Озгур айылынын тургуну Эмилбек Эргешов билдирди.
Ал эми Жапалак айыл өкмөтүнүн жер боюнча адиси Жамшит Абылов үлүш жерлердин сатылышы мыйзамсыз экенин билдирди.
"Үлүш жердин бөлүнгөнүнө 20 жыл болду. Тийиштүү документтердин бардыгы айыл тургундарынын колунда бар. Жер салыктары да убагында төлөнгөн. Учурда бул жерлерге кызыккан тараптар чыгып жатканы тууралуу кептер тарап жатат", — деп билдирди Абылов.
Учурда бул маселе боюнча Мамлекеттик каттоо кызматынын жообу күтүлүп жатат.
