БИШКЕК, 26-дек. — Sputnik. Кечээ, 25-декабрь күнү, мурдагы "Айпери" тиричилик үйүнүн 2-кабатынан чыккан өрт саат 21.14тө толугу менен өчүрүлгөнүн ӨКМ билдирди.
Эскерте кетсек, кырсык тууралуу маалымат түштөн кийин келип түшкөн. Бир сааттан кийин ал чектелип, майда очоктору өчүрүлүп жатканы айтылган.
"Аталган имараттын ичиндеги "Center bar" кафесинин ички тарабында өрт чыгып, коюу түтүн каптап калган. Натыйжада имараттын чатырында жайгашкан желдетүүчү шахтасынын ичине жыйылган 1 тоннага жакын рубероид күйгөн. Өрттүн аянты болжол менен 150 чарчы метрди түздү", — деп айтылат маалыматта.
Өрттү өчүрүү иштерине төрт өрт өчүрүүчү унаа, куткаруучулар, милиция кызматкерлери тартылган.
Жабыркагандар жок. Учурда өрттүн себеби жана материалдык чыгымы такталууда.
