БИШКЕК, 25-дек. — Sputnik. Өзбекстанга иш сапары менен барган президент Алмазбек Атамбаевди өлкө башчы Шавкат Мирзиёев аэропортко өзү узатты. Бул тууралуу президенттик аппараттын тышкы саясат бөлүмүнүн жетекчиси Сапар Исаков сапардын жыйынтыгын чыгарып жатып билдирди.
Анын айтымында, сапар жогорку деңгээлде өтүп, тараптар жолугушуунун жыйынтыгына ыраазы болгон.
"Күн мурун айткандай болбоюн, бирок учурда эки тараптуу иш-чаралар жогорку деңгээлде өтүп жатканын белгилегим келет. Айрым кемчиликтерди жойгондон кийин макулдашуулардын жыйынтыгы боюнча эки айдан кийин брифинг өтөт", — деди Исаков.
Ал Атамбаев Шавкат Мирзиёевдин президент болуп шайланышынан кийин жолуккан биринчи өлкө башчы болуп саналарын белгиледи.
"Шавкат Миромонович Алмазбек Шаршеновичти аэропортко өзү узатты. Кыргыз делегациясы иш сапардын жүрүшүнө, жыйынтыгына ыраазы. Өлкө башчы бир айлык мөөнөт менен аткарыла турган тапшырмаларды берди. Баарын аткаруу үчүн күн-түн дебей иштейбиз", — деди атка минер.
Атамбаев Өзбекстанга 24-декабрь күнү иш сапар менен барган. Анын алкагында маркум Ислам Каримовдун мүрзөсүнө куран түшүрүп, Мирзиёев менен сүйлөшүүлөрдү жүргүздү.
