БИШКЕК, 24-дек. — Sputnik. Кыргыз-орус славян университетинин студенти Алина Фролова Россияда өтө турган "Аалам ажары — 2017" эл аралык сулуулук сынагынын чейрек финалына өттү. Бул тууралуу сынактын расмий сайтына жарыяланды.
Катышуучуларга интернет аркылуу кастинг жүргүзүлүп, уюштуруу комитети эки ай ичинде түшкөн арыздарды карап чыккан. Учурда чейрек финалга өткөн сулуулардын тизмеси чыгарылды.
"Алина Фролова Кыргызстандан "Аалам ажары — 2017" сынагынын чейрек финалына өткөн эң биринчи катышуучусу болду", — деп жазылат маалыматта.
"Аалам ажары — 2017" сулуулук сынагынын катышуучулары жарым финалга өтүү үчүн көрүүчүлөрдүн жетиштүү добушун алуусу керек. Ал эми финалда жеңүүчү калыстар тобунун чечими менен аныкталат.
Финалдык сынак келерки жылдын экинчи жарымында өткөрүлөт. Баш байге ээсине 25 миң доллар тапшырылып, таажы кийгизилет.
