БИШКЕК, 19-дек. — Sputnik. Таланттуу ырчы жана обончу Чубак Сатаевге эстелик коюлганы жатканын уулу Кубаныч Сатаев Sputnik Кыргызстан агенттигине билдирди.
Анын айтымында, ырчынын эстелиги азыр Бишкек шаарында жасалып жатат.
"Айкел толугу менен жасалып бүтө элек. Дагы кошумчалай турган нерселер бар. Таластагы Боо-Терек айылындагы клубга атамдын аты берилген. Айкелди ошол имараттын алдына орнотобуз", — деди уулу.
Чубак Сатаев мындан 23 жыл мурун 33 жаш курагында көз жумган. Анын "Ак бата", "Жарамазан", "Түштүк кыз", "Арман", "Кара көз" сыяктуу ырлары ар бир кыргыздын жүрөгүнөн орун таап, ушул күнгө чейин ырдалып келет.
