БИШКЕК, 19-дек. — Sputnik. Бишкекте үстүбүздөгү жыл ичинде 540 жайма базар жабылганын Ленин райондук администрациясынын жетекчисинин орун басары Адилет Малдыбаев билдирди.
Анын айтымына караганда, жыл башынан бери жайма базарларды жок кылуу маселеси бир нече ирет каралып, талкууланган.
"Жайма базар борбор калаа үчүн чыныгы көйгөй болуп эсептелет. Биз бул маселенин үстүндө катуу иштеп жатабыз. Көйгөйлүү аймактардын бири катары Ош базарынын аймагы болуп эсептелет. Жалпысынан алганда жайма базарга каршы күрөш кыйла күчөтүлдү. Бул боюнча иштер жума сайын дем алыш күнгө карабастан жүрүп турат", — деп билдирди Малдыбаев.
Мыйзам бузуу катталып калса протокол түзүлүп, айыпталуучу сотко чакыруу алат. Эгер сот сатуучуну күнөөлүү деп тапса, ага эки миң сом айып пул салынат.
Мындан тышкары, муниципалдык кызматтар дары-дармекти мыйзамсыз саткандарды аныктоо үчүн атайын рейд өткөрүүдө. Акыркы рейд Кулиев көчөсү менен "Берекет" базарынын аймагында жүргүзүлүп, натыйжада аталган аймакта иштеген бардык сатуучулар лицензиясыз иштеп жатканы белгилүү болгон. Ошондой эле Ош базарынын аймагынан дары-дармек сакталган үч кампа табылган.
Күчөтүлгөн текшерүүлөр жаңы жыл кирип келген күнү дагы уланат.
