БИШКЕК, 18-дек. — Sputnik. Сегиз жашка чейинки балдардан түзүлгөн "Бишкек" хоккей командасы бүгүн Алматыга сапар тартышты. Бул тууралуу Sputnik Кыргызстан агенттигинин кабарчысына Хоккей федерациясынын вице-президенти Мурат Жакыпов билдирди.
Анын айтымына караганда, кыргызстандык кичинекей спортчулар Казакстандын командалары менен жолдоштук беттеш өткөрөт.
"Биздин курама тобубуз 19-21-декабрь аралыгында Алматыда үч оюн өткөрөт. Анда "Бишкек" командасы казактардын "Акула", "Стриж" жана "Алмата" топтору менен беттешет. Былтыркы оюндарда бирде жеңип, бирде жеңилип жатканбыз. Бирок, быйылкы Сочидеги оюндан кийин курама топ кыйла такшалып калды. Менин оюмча жеңишке болгон мүмкүнчүлүктөр чоң", — деп билдирди Жакыпов.
Ал белгилегендей, "Бишкек" командасынан 20 оюнчуну машыктыруучу Ренат Мустафаев жетектеп кетти. Жолдоштук беттеш казак тараптын демилгеси менен ишке ашып жатат.
Эске салсак, "Бишкек" хоккей командасы Сочиде өткөн турнирде "Грозный" курама тобун 11:4 эсебинде жеңип алган.
