БИШКЕК, 15-дек. — Sputnik. Пенсионерге болушкан Бишкектин 22 жаштагы тургуну аны №193 маршруттук таксинин айдоочусу сабаганын айтууда. Бул тууралуу шаардык ички иштер башкармалыгын маалымат кызматы билдирди.
Өткөн жума күнү, 9-декабрда, Улуттук госпиталга денесинен жаракат алган Бишкек шаарынын тургуну кайрылган. Андан соң ал кат жүзүндө милицияга арыз жазып, №193 маршруттук таксинин айдоочусу тарабынан сабагалганын айткан.
"Милиция баланы сабаганга шектелген айдоочуну тапты. Ал Жалал-Абад облусунун 36 жаштагы тургуну экени аныкталды", — деп айтылат билдирүүдө.
Азыр тергөө ишин Бишкек шаарынын Октябрь райондук ички иштер башкармалыгы алып барууда. Учурда соттук-медициналык экспертизанын жыйынтыгын күтүлүп жатат.
Дарыгерлердин маалыматына ылайык кайрылган жарандын баш мээси жабыркаган. Ал азыр стационардык дарыланууда.
