БИШКЕК, 15-дек. — Sputnik. Таксисттердин көбү — соттолуп чыккандар. Бул тууралуу КСДП фракциясынын депутаты Жылдыз Мусабекова парламентте ар кандай маселелер каралып жатканда билдирди.
Эл өкүлү акыркы учурларда таксилердин катышуусу менен ызы-чуулар көп чыгып жаткандыгын айтты.
"Таксинин айдоочусу өткөндө эле кыздарды сабап салып чуу чыкты. Кийин милиция кызматкерлер менен урушкан окуя болду. Мурун таксилерди көзөмөлдөн өткөрүп туруп анан каттамга чыгарчу. Биз тактап көрсөк, такси айдагандардын көбү мурда соттолгон адамдар экен", — деди Мусабекова.
Ал жаңы конуштарда жашагандарга таксиге түшүү кооптуу болуп жаткандыгын айтып, аларга лицензия берип жаткандарды катуу көзөмөлгө алуу керектигин кошумчалады.
