Эл аралык мелдешке аталган окуу жайдын окуучулары Дөөлөтбак Кудайбергенов, Бекназар Уланбек уулу, Ажыбек Шаршенбаев жана Абдурауф Көлбай уулу катышып, аларды информатика мугалими Икрам Абдыкалыков жетектеп барган.
"Роботекс-2016" роботтор аралык сынак быйыл Эстонияда өткөрүлдү. Жалпысынан 26 мамлекеттен 2260 катышуучу, 16 миңден ашык көрүүчү келди. Сынакта түрдүү түзүлүштөгү роботтор 20 категорияда ат салышты. Биз Line Follower жана Sumo Lego деп аталган категорияларга даярданып барып, 200 роботтун ичинен 5-орунду камсыз кылдык ", — деди Абдыкалыков.
Эл аралык сынакка биринчи жолу катышып жатканын айткан балдар буга чейин ата мекендик "Себат" лицейи өткөргөн роботтор сынагынан биринчиликти алышкан.
"Биздин командабыздын аты "Нарынград" деп аталат. Ал эми роботторубузга да ысым ыйгарып койгонбуз. Жарышка чыккан робот унаабыздын аты Флешбек болсо, сумого чыгып күрөшкөн робот Теңирбек деп аталат", — деди лицейдин 10-классынын окуучусу Уланбек уулу Бекназар.
Робот жасоо 5-6 жылдан бери Кыргызстандагы "Себат" лицейинин жети облустагы филиалдарына өзүнчө сабак катары киргизилген.
