БИШКЕК, 10-дек. — Sputnik. Индонезиянын Ачех облусунда катталган жер силкинүүдөн улам, 43 миң адам турак жайын таштап кетүүгө аргасыз болду. Бул тууралуу Ассошиэйтед Пресс агенттигине РИА Новости таянып маалымдады.
Мындан мурда 23 миңдей адам кеткени тууралуу маалымдалган.
"Көчүрүлүп жаткан үй-бүлөлөрдүн саны дагы өсүшү мүмкүн. Учурда бийлик муктаж болгон буюм-тайым, тамак-аш менен адамдарды камсыз кылуу боюнча иштеп жатат", — деп жазылат маалыматта.
7-декабрь күнү Ачех облусунда күчү 6,5 баллга жеткен жер силкинүү катталган. Кырсыктан 100дөй адам каза болуп, 136 жергиликтүү тургун оор жаракат алып, 12 миңге чукул турак жай талкаланган.
