БИШКЕК, 6-дек. — Sputnik. Тибеттин руханий лидери Далай Лама "Манас" китебин белекке алып, ак калпак кийди. Коомдук ишмер Аскар Айтматов Далай Лама менен Индиянын Дарамсала шаарындагы резиденциясында 5-декабрда жолугуп, ага Темирлан Сарлыкбек уулунун кыргыз, түрк, орус жана англис тилдеринде даярдап чыгарган "Манас – адамзат тарыхынын мурасы" китебин белекке берди. Бул тууралуу автор Темирлан Сарлыкбек уулу Sputnik Кыргызстан агенттигине билдирди.
Ал буга чейин "Манас" китебин Ислам кызматташтык уюмунун башкы катчысы, Түркиянын президенти, Крым татарларынын лидери сыяктуу бир топ атактуу инсандарга бергенин кошумчалады.
Эске салсак, Далай Лама 1935-жылы туулган. Тибет буддизминин руханий лидери болуп эсептелет. 1989-жылы Нобель сыйлыгына татыган. 2007-жылы АКШ конгрессинин эң жогорку сыйлыгы болгон "Конгресстин алтын медалын" алган.
