БИШКЕК, 3-дек. — Sputnik. Премьер-министр Сооронбай Жээнбеков Майыптардын эл аралык күнүнө байланыштуу Бишкектеги мүмкүнчүлүгү чектелгендерди реабилитациялоо борборуна барып, 200 миң сом берди. Бул туурасында өкмөттүн маалымат кызматы кабарлады.
Өкмөт башчы борбордун имаратын кыдырып чыгып, эмгек жамаат жана тарбиялануучулары менен баарлашты.
Мекеме директору Гүлнара Аманкулованын айтымында, борбор 1999-жылдан тарта иш алып барат.
"Негизги максат — мүмкүнчүлүгү чектелген жактар үчүн көп багыттуу адискөй реабилитациялык көмөк көрсөтүү, өзүн-өзү тейлөө, эмгек терапиясы ыкмалары аркылуу алардын көз карандысыз жашоо образына жетишүүсүнө көмөк берүү. Борборго 2016-жылдын 11 айында 300дөн ашуун адам келген", — деди ал.
Өкмөт башчы эмгек жамаатын алардын эмгеги жана майыптарга мээримдүү мамилеси үчүн ыраазычылык билдирди.
Жээнбеков мүмкүнчүлүгү чектелгендерди реабилитациялоо борборунун директоруна 200 миң сомдук сертификат тапшырды.
