БИШКЕК, 3-дек. — Sputnik. Кыргызстандын башкы прокурору Индира Жолдубаева кытайлык кесиптеши Цао Цзянмин менен жолугуп, Балыкчы — Корумду унаа жолунун реконструкциясына байланышкан кылмыш иши боюнча сурамдарды эртерээк карап чыгуусун өтүндү. Бул тууралуу Башкы прокуратура билдирди.
Жолугушуу Шанхай кызматташтык уюмуна мүчө мамлекеттердин башкы прокурорлордун 14-жыйынынын алкагында Санья шаарында өттү.
"Мында Балыкчы — Корумду жолун реконструкциялоо боюнча кылмыш ишти иликтөөгө Кытайдын укуктук жардам берүү маселеси көтөрүлдү. Жолдубаева кытайлык кесиптешине кайрылып, сурамды эртерээк карап берүүсүн өтүндү", — деп айтылат маалыматта.
Аталган трассанын курулушу жалпы жонунан 6,8 миллион сомду түзөт. Реконструкция боюнча келишим "Лонг Хай" компаниясы менен түзгөн. Бул кытайлык ишкананын кызыкчылыгын көздөөгө байланышкан чырдын чыгышына негиз болуп, Темир Сариев премьер-министрликтен, транспорт министри Аргынбек Малабаев менен анын орун басары Улан Уезбаев кызматтан кетишкен. Учурда козголгон кылмыш ишин Башкы прокуратура иликтеп жатат.
