БИШКЕК, 28-ноя. — Sputnik. Уюшкан кылмыштуу топтун мүчөсү делген Алмамбет Анапияевдин агасы Галмамат Анапияев кармалды. Бул тууралуу Ош шаардык ИИБден кабарлашты.
Билдирмеге караганда, Кыргыз улуттук университетинин жетекчилиги окуу жайдын Оштогу филиалында студенттерге мыйзамсыз түрдө дипломдор берилип жатканын айтып милицияга билдирме жөнөткөн.
"Тергөө учурунда Ош шаары боюнча Мамэкотехинспекциянын мурдагы жетекчиси Галмамат Анапияевге мыйзамсыз түрдө "каржы жана кредит" адистиги боюнча диплом берилгендиги аныкталган", — деп айтылат маалыматта.
Белгилей кетсек, Галмамат Анапияев 2015-жылы Экологиялык жана техникалык коопсуздук боюнча мамлекеттик инспекциясынын Ош шаардык бөлүмүн жетектеп турганда, жарандан 1000 доллар опузалап алууга шектелип, кийин 30 миң сом пара алып жаткан жеринен кармалган. Соттун чечими менен 4,2 миллион сом айыпка жыгылган. Ал уюшкан кылмыштуу топтун мүчөсү делген Алмамбет Анапияевдин бир тууган агасы болуп эсептелет. Алмамбет Анапияев 2015-жылы Минск шаарында киши колдуу болгон.
