БИШКЕК, 26-ноя. — Sputnik. Бишкектеги Тунгуч кичи районун жанындагы "Рухий Мурас" жаңы конушунда дүкөн кармаган үй-бүлөгө кол салуу болуп, алардын бири катуу жаракат алган. Учурда шектүүлөр кармалды деп билдиришти шаардык милициядан.
"Рухий Мурас" жаңы кошунунан түнкү саат 01.58де милицияга кайрылышкан. 34 жаштагы жабырлануучу аялдын билдиргенине караганда, ал түндө коноктон келе жатып дарбазасынын жанында бир эркекти көргөн. Бирок ага көңүл бурбай, короосуна киргенде дүкөнүнүн терезесинен маскачан киши түшүп келатканын көрүп, кыйкыра баштаган. Бул маалда көчөдө турган эркек чуркап келип, эки ирет бычак менен уруп ийген", — дешти милициядан.
Маалыматтарга караганда аялдын иниси эжесине жардам берем деп өзү дагы жаракат алып, бетине төрт ирет бычак сайылган.
Жабырлануучулар Бишкектеги улуттук хирургия борборуна жеткирилди. Маалыматтарда, аялдын акыбалы оор. Ал эми уурулар дүкөндөн акча алып чыгууга жетишкен.
Шаардык милициядан, учурда кылмышка шектүү делген төрт адам кармалып, иликтөө иштери жүрүп жаткандыгын кабарлашты.
"Алардын улуусу Сокулуктун 31 жаштагы, экинчиси Токмоктун 29 жаштагы тургуну экен. Дагы бирөөнүн Бишкекте жашаган 27 жаштагы киши, ал эми эң кичүүсү 26 жаштагы Нарында туулган жаран экендиги аныкталды", — деп билдиришти шаардык милициядан.
Учурда кармалганда Аламүдүн райондук ички иштер бөлүмүндө кармалып турат.
