БИШКЕК, 24-ноя. — Sputnik. Япониядан Кыргызстанга алынып келинген радиациялык фону жогору автотранспорт каражаттары дезактивациялоодон өткөрүү боюнча токтомго премьер-министр Сооронбай Жээнбеков кол койду. Бул туурасында өкмөттүн маалымат кызматы кабарлады.
Документте Мамлекеттик бажы кызматына радиациялык фону жогору автотранспорт каражаттарынын санын тактоо, аларды дезактивациялоо боюнча жумуштарды жүргүзүүнүн планын иштеп чыгуу белгиленген. Ага ылайык, Өзгөчө кырдаалдар министрлиги жана Ички иштер министрлиги менен бирдикте "Аламүдүн" пунктунан "Кыргыз турак жай коммунсоюз" ишканасынын радиоактивдүү калдыктарды көмүүчү пунктуна дейре мыйзамдарынын жана нормаларынын талаптарына ылайык дезактивациялоо үчүн жеткирүүсү керек.
Саламаттык сактоо министрлигине, Өзгөчө кырдаалдар министрлигине, Курчап турган чөйрөнү коргоо жана токой чарбасы мамлекеттик агенттигине, Экологиялык жана коопсуздук боюнча мамлекеттик инспекциясына бажы жана чек ара органдары менен биргеликте автотранспорттук каражаттарды дезактивациялоо сапатынын радиациялык көзөмөлүн камсыздоо тапшырылды.
Япониядан Кыргызстанга алынып келген радиациялык фону жогору автотранспорт каражаттарын радиациялык көзөмөлдөө жана дезактивациялоо тууралуу Жобо бекитилген.
