ОШ, 22-ноя. — Sputnik. Ош технологиялык университетинин окутуучусу Баатыр Акматов суу жылытуучу жаңы аппарат ойлоп тапканын Sputnik Кыргызстан маалымат агенттигинин кабарчысына билдирди.
Акматовдун айтымында, аппаратты жасап чыгууга бир топ убакыт кеткен. Жаңы аппарат электрофизикалык иондоштуруу ыкмасы менен жасалган. Окутуучу бул эмгеги менен Москва шаарында уюштурулган көргөзмөгө дагы катышып келген.
"Майда электроддорду пайдаландым, суу жылытуучу "Аристон" аппаратына караганда мен жасаган аппаратка электр энергиясы эки эсе аз коройт. Алсак, "Аристон" 250 вольт электр энергиясы менен суу жылытат. Эгерде энергиянын кубаттуулугу 150 вольтко түшсө ал сууну жылыта албай калат. Мен ойлоп тапкан аппарат 150 вольт энергия менен да сууну жылытуу күчүнө ээ", — дейт Акматов.
Акматов азырынча мындай аппарат өлкө аймагында жок экенин айтат. Андыктан электр энергиясын аз колдонгон жабдыкты элге жайылтса жакшы болмоктугун кошумчалады.
Бул аппарат Акматовдун докторлук иши. Аны ушул жылы жактай тургандыгын билдирген окутуучу өзүнүн аппаратын өндүрүшкө чыгаруунун аракетин көрүүдө.
