БИШКЕК, 22-ноя. — Sputnik. Жергиликтүү кеңештин болочоктогу депутаттарына төш белги менен мандатын тастыктаган күбөлүк сатып алуу мыйзам талабы деп айтты Sputnik Кыргызстандын кабарчысына Боршайкомдун башчысы Нуржан Шайлдабекова.
Социалдык тармактын катышуучулары мындай суммага төш белги сатып алуу демилгесине нааразылыктарын билдиришкен.
Бир катарлары муну "аш көп болсо каада көп" сымал айтышса, бир катарлары акчаны максатуураак пайдалануу зарылдыгын жазышкан.
Буга БШК төрайымы Шайлдабекова мыйзам боюнча депутаттар төш белги тагынып, күбөлүк алышы керектигин билдирди. Ал атрибуттарды шайлоо өткөргөн орган берүүгө тийиштигин кошумчалады.
"Маселен, Жогорку Кеңеш БШКнын мүчөлөрүн шайлайт да, алар бизге күбөлүк сатып берет. Бул мурдатан эле жасалып келе жаткан иш. Биз жергиликтүү кеңешке 7500гө чукул депутат шайлайбыз, тендердин суммасы 6,3 миллион сом. Бул ашыкча кеткен сумма деп айтпас элем", — деди Шайлдабекова.
Ал тендерди токтотпой тургандыктарын билдирди. Төрайым тендерге катышууга бир гана компания арыз берсе же продукция менен камсыздай турган тарап тандалбай калган учурда конкурс жокко чыгарыларын айтты.
"Бирөөгө жакпай калыптыр деп эле тендерди токтотуп салбайбыз да. Биз мыйзамдын талаптарын аткарып жатабыз. Азырынча андай сөздөргө жооп кылып, тендерди жокко чыгарууга негиз жок",— деди БШК башчысы.
Жергиликтүү кеңешке шайлоо Кыргызстанда 2016-жылдын 11-декабрында өтөт. Ал 380 айыл аймак менен 22 шаарды камтыйт.
