БИШКЕК, 18-ноя. — Sputnik. Өмүрбек Бабанов убадасына туруп, мындан ары "Ата-Журт" партиясынын атын колдонбойт деп ойлойм. Бул тууралуу Sputnik Кыргызстан агенттигине Камчыбек Ташиев билдирди.
Экс-депутат Камчыбек Ташиев Өмүрбек Бабанов экөөнүн "Республика – Ата Журт" тандеминин ажырашын өзү демилгелегенин, бул кадамга экөөнүн саясий багыттары себеп болгонун билдирди.
Анын айтымында, эми "Республика" партиясы "Ата-Журттун" атын пайдалана албайт.
Ошондой эле "атажуртчу" азыркы парламенттик оппозициянын иш-аракетине нааразы экенин жашырган жок.
"Бүгүнкү күндө парламентте оппозиция жок. Оппозиция болчу чоң фракциялар бийликке түздөн-түз баш ийип беришти. Болгону Өмүрбек Текебаев өзү оппозициянын арабасын тартып бара жатат. Биз күчтүү саясий топ түзүп, өз ара кеңешип туруп келерки жылы болуучу президенттик шайлоого бир адамды алып чыгабыз деп үмүттөнүп турабыз", — деп сөзүн жыйынтыктады ал.
Эске салсак, 2014-жылкы парламенттик шайлоонун алдында "Республика" жана "Ата Журт" партияларынын лидерлери шайлоого бирге барарын жар салып, "Республика – Ата Журт" партиясын түптөшкөн.
