БИШКЕК, 18-ноя. — Sputnik. КР Башкы прокуратурасы УКМКнын Коррупцияга каршы күрөшүү кызматына мурдагы транспорт жана жолдор министри Замирбек Айдаровго байланыштуу материалдарды кайтарды. Бул тууралуу Башкы прокуратуранын маалымат кызматы билдирди.
Айдаровдун Бишкек — Кара-Балта жолун реконструкциялоо боюнча тендер өткөрүүгө тийиштиги бар деген ишти Коррупцияга каршы күрөшүү кызматы карап жатканын кошумчалады.
"Бирок УКМКнын Коррупцияга каршы күрөшүү кызматы толук текшерүү жүргүзбөгөндүктөн аталган материалдар кайтарылды", — деп Башкы прокуратурадан билдиришти.
2015-жылы 15-декабрда Бишкек — Кара-Балта жолун оңдоого конкурс жарыяланган. Долбоордун жалпы суммасы 128 миллион 800 миң долларды түзгөн. Азия Өнүктүрүү банкы 65 миллион бөлүп, дагы 35 миллионду грант катары берген. Калган 20,8 миллионун өкмөт каржылашы керек.
2016-жылы июнда жеңүүчү аныкталбагандыктан чыр чыккан. Азия Өнүктүрүү банкы Транспорт министрлигине China Railway №5 Engineering Group Co компаниясын тандоону сунуштаган. Бирок тендердик комиссия башка чечим кабыл алган.
