Егерлер Балыкчынын чет жакасынан 12 карышкыр атты

БИШКЕК, 17-ноя. — Sputnik. Балыкчы шаарына караган Кызыл-Саз аймагында ит-куш күч алып, октябрдан бери егерлер төрт чөө, он эки карышкыр атты. Бул туурасында Ысык-Көл мамлекеттик коругунун егери Канат Абдышев Sputnik Кыргызстан сайтына кабарлады.

Анын айтымында, Балыкчы шаарынын четки аймагы болгон Кызыл-Сазда Ысык-Көлдүн Ак-Өлөң айылындагы тоолордон түшкөн карышкыр, чөөлөр эшектерге, майда жандыктарга кол салып, жеп кеткен учурлар арбын кездешкен.

"Мындан улам, шаардык "Санитардык тазалык жана ирээтке келтирүү" муниципалдык ишканасы ок-дарылар менен камсыз кылууну суранып Ысык-Көл мамлекеттик коругунун егерлерине кайрылган. Анын жыйынтыгында эки жумада төрт чөө, 1,5 жарым айда он эки карышкыр аттык", — деди Абдышев.

Анын айтымында, жырткычтардын көбөйүп кеткенинен улам, мектепке барган балдардын өмүрүнө кооптуулук жаралган. Андыктан азыртадан бул ишти колго алуу зарыл.

"Азыр карышкырлар, чөөлөрдүн үйүгүшүп турган маалы. Тоолордон кирип келген учурлары бар. Таң заарда окуучулар мектепке баргандыктан, ата-энелер коопонууда. Эгер топ карышкыр болсо адамга да кол салышы турган иш. Андыктан азыртан атып, чочутуп, аймактан алыстатыш керек, болбосо шаарга деле кирип келиши мүмкүн", — деди ал.

Учурда өлкө аймагында карышкырлардын күч алып турган маалы. Жакында эле Нарын облусунун Кочкор районундагы Ак-Жар айылынын Ак-Булуң аймагында төрт жаштагы балага кол салган.