БИШКЕК, 15-ноя. — Sputnik. Кыргызстан менен Бахрейндин футболчулары беттешүүдөн 0:0 эсеби менен тең чыкты.
Оюн Бахрейндин борбор калаасы Манама шаарындагы Улуттук стадиондо өттү. Ал 2019-жылы өтө турган Азия кубогунун тандоо туруна карата даярдык болуп саналат. Квалификациялык оюндар 2017-жылы башталат.
Эл аралык футбол федерациясынын рейтингинде Кыргызстан 99-орунда болсо, Бахрейн 123-сапты ээлеп келет.
Биринчи таймда атаандаштар теңтайлашкан оюн көрсөтүштү. Дарбазачылардын шамдагайлыгы жана чабуулчулардын кетирген каталары гол киргизүүгө мүмкүндүк берген жок. Экинчи таймдын башталышы да бир кылка өтүп, ортосуна келгенде кыргызстандык оюнчулар демилгени өз колдоруна алды. Бирок буга бахрейндик футболчулар туруштук бере алышты. Кошумча берилген убакытта да эки команда активдүү болгону менен топ дарбазага кирбеген боюнча калды. Ошентип беттешүү 0:0 эсеби менен аяктады.
Жалпысынан эки мамлекеттин командалары буга чейин 5 жолу беттешсе, алардын төртөө расмий болгон. Ал оюндардын баары Кыргызстандын жеңилүүсү менен аяктаган. КР оюнчулары расмий эмес бир гана беттешти уткан.
