БИШКЕК, 7-ноя.— Sputnik. Россиянын Владимир облусунда өткөрүлгөн бокс боюнча мелдеш учурунда олимпиадалык резервдеги спорт мектебинин 15 жаштагы окуучусу каза болду. Бул тууралуу облустук тергөө комитетинин расмий сайтында жазылган.
Тергөө иштери көрсөткөндөй мурда окуучу бала башынан оор жаракат алган, мындан улам анын ден-соолугуна аяр мамиле жасалышы керек болчу.
Маалыматтар боюнча 3-ноябрда баланы "Молодежный" спорт комплексинде өтүп жаткан мелдешке жиберишкен. Мелдештен эки күн өткөн соң 5-ноябрь күнү ал Владимир облусундагы оюнга катышып, мелдештин жүрүшүндө каршылашынан жеген үч соккудан кийин эсин жоготуп, таймаш калыс тарабынан токтотулган.
Натыйжада баланын абалы кескин начарлайт. Мелдешке көз салган жардамчылар ага биринчи жардам көрсөтүшкөн. Дарыгерлердин ыкчам аракетине карабай, өспүрүм ооруканага бараткан жолдо каза болгон.
