БИШКЕК, 5-ноя. — Sputnik. Кайгуул милиция башкармалыгы айдоочуну жаман сөздөр менен мазактаган инспектордун видеосу боюнча териштирүү дайындады. Бул тууралуу аталган башкармалыктын маалымат кызматы билдирди.
Активист Болот Ибрагимов өзүнүн Youtube каналына кайгуул Ильязов фамилиясындагы кызматынын өкүлү унааны токтотуп салык төлөгөн талонун сураган видеосун салган.
"Инспектор рейдге байланыштырып айдоочудан документтерин көрсөтүүнү талап кылган. Инспекторго айдоочу документ көргөзбөй, акча бербей, ал тургай "салам алейкум, байке, кечиресиз" деген сөздү айтпаганы үчүн айдоочуну милиционер сөгүп кетип калган", — деп жазылат Ибрагимовдун Youtube каналында.
Кайгуул милиция башкармалыгы билдиргендей кызматтык териштирүү иштеринин жыйынтыгы 8-ноябрда белгилүү болот. Инспектор кызматтык этиканы бузгандыгы үчүн, дисциплиналык жаза алышы мүмкүн деп түшүндүрүлөт билдирүүдө.
