БИШКЕК, 2-ноя. — Sputnik. Москвада 6-ноябрда самбо күрөшү боюнча Кыргызстандын чемпионаты боло турганын "Айкөл Манас" клубунун вице-президенти Кылычбек Пазылов билдирди.
Анын айтымында, Кыргызстандын чемпионатын Россияда өткөрүү аргасыз жагдайга байланыштуу. Анткени Кыргызстандын чемпионатын өткөрө электе эле жолдомолорду ойнотууга туура келген.
"Бир айдан кийин 10-декабрда Москвада самбо күрөшү боюнча дүйнөлүк чемпионат болуп өтөт. Ага өлкөнүн биринчилигин алган спортчулар жолдомо алышат. Ошондуктан биздин чемпионатты Россиянын борборунда өткөрүү чечими чыгарылган. Ал жакта курама команда дүйнөлүк чемпионатка даярданат. Кийинки биринчиликтер Кыргызстанда өткөрүлөт. Маселе КРдин Самбо боюнча федерациясы тарабынан бекитилет", — деди Пазылов.
Ал белгилегендей, өлкөнүн чемпионатына катышууга 100дөй спортчу жазылды. Жалпысынан жети салмактык категория болот, ар бир категориянын жеңүүчүлөрү дүйнөлүк чемпионатка барат.
