БИШКЕК, 24-окт. — Sputnik. Премьер-министр Сооронбай Жээнбеков бир катар фильмдерди, анын ичинде порнографиялык элементтерди камтыган тасмаларды сатыкка чыгарууга тыюу салуу боюнча өкмөттүн токтомуна кол койду.
Аталган токтом 21-октябрда өкмөттүн сайтында жарыяланды.
Ага ылайык, Кыргызстандын аймагында төмөнкүдөй көрүнүштөрдү камтыган аудиовизуалдык чыгармаларды сатууга тыюу салынат:
- порнография көрүнүштөрү (эпизод);
- экстремисттик жана сепаратисттик чыгармалар;
- бийликти басып алууга, конституциялык түзүлүштү күч менен өзгөртүүгө, суверенитет жана мамлекеттин аймактык бүтүндүгүн бузууга багытталган ачык үгүттөр;
- согуш, зомбулук жана таш боордукка чакырыктар;
- терроризмди актоого чакырган жана башка террористтик иш-аракеттерди колдогон;
- коомдук коопсуздукту бузууга багытталган ачык жарыялар;
улуттук атрибуттар жана символикалар, башка террористтик уюмдардын тыюу салынган белгилерге (көркөм акталган ой-толгоолордон сырткары) үгүттөгөн коомдук демонстрациялар;
жарандык жана улуттук этика нормаларын бузган, мамлекеттик символикалык атрибуттарын (герб, туу, гимн) мазактаган;
баңги, психотроптук заттарды жана маалыматтарды ачык үгүттөгөн;
өзүн-өзү өлтүрүүгө чакырган же өзүн-өзү өлтүрүү боюнча сюжеттер жана аргументтерди камтыган үгүттөр.
Бул тизмеге кире турган тасмаларды атайын түзүлгөн ведомство аралык эксперттик комиссия аныктайт.
