БИШКЕК, 24-окт. — Sputnik. Кургак учукка каршы ФС-1 дарысын мыйзамсыз клиникалык сыноодон өткөрүү эки адамдын өлүмүнө алып келди. Бул тууралуу Башкы прокуратуранын маалымат кызматы билдирди.
Ага ылайык, Улуттук фтизиатрия борбору "Дары-дармек каражаттары жөнүндө" мыйзамына каршы тиешелүү аккредитациядан өтпөй туруп, казакстандык мекеме менен келишим түзгөн. Алынган дары каражаттары сыноодон өткөрүлмөк.
"Натыйжада ФС-1 дарысы кургак учук менен жабыркаган бейтаптарга берилип, сыноодон өткөн. Каражаттар иш-чарага катышкан 54 бейтаптын 10унун башка оорусун козгоп чыкса, дагы эки киши каза болгон", — деп айтылат билдирүүдө.
Башкы прокуратура Улуттук фтизиатрия борбору менен Дары-дармек менен камсыздоо жана медициналык техника департаментинин жетекчилигине кылмыш ишин козгоду. Аларга Кылмыш кодексинин 304-беренеси (кызмат абалынан кыянаттык менен пайдалануу) жана 315-беренесинин (документтерди жасалмалоо) негизинде айып тагылууда.
Учурда тергөө иштери жүрүп жатат.
