БИШКЕК, 24-окт. – Sputnik. Москванын Хорошевский соту дүйшөмбү күнү төрт жаштагы кызды өлтүргөн деп шектелип жаткан Гүлчахра Бобокулованын ишин карай баштайт. Бул тууралуу РИА Новости билдирет.
Соттун төрагасы жыйын саат 14:30га белгиленгенин жана ал жабык түрдө болорун айткан.
Жыйындын жүрүшүндө прокурор жоопко тартуу актысын угузуп, андан соң сот жабыр тарткан тарапты сурап баштайт.
Тергөөчүлөрдүн айтымында, өзбекстандык бала багуучу Гүлчахра Бобокулова ата-энеси улуу баласын алып чыгып кеткен соң төрт жаштагы кызын өлтүрүп, батирин өрттөп, көчөгө чыгып кеткен.
Окуяга күбө болгондордун айтымында, "мыкаачы" аялды кармаганга чейин ал кыздын кесилген башын көтөрүп алып 20 мүнөткө чукул көчөдө жүргөн. Ал өзү менен өзү сүйлөшүп, өтүп жаткан элдерди жана полиция кызматкерлерин да коркуткан.
Кармалгандан кийин аялга атайын комплекстүү соттук-психиатриялык экспертиза жүргүзүлүп, 39 жаштагы Бобокулова өнөкөткө айланган психикалык оору менен жабыркай турганы далилденген.
Ал "жашы жете элек баланы өлтүрүү", "башканын мүлкүн өрттөө жолу менен жок кылуу" жана "жарылуу жөнүндө жалган маалымат таратуу" деген беренелер боюнча күнөөлөнүүдө.
