ИИМ: Ала-Букада башка динди тутунган аялдын сөөгүн милиция казып чыгарган жок

БИШКЕК, 24-окт. — Sputnik. ИИМдин 10-башкы башкармалыгынын кызматкерлери баптис аялдын сөөгүн казып чыгарып койгон деген маалымат чындыкка коошпой турганын ИИМдин маалымат кызматы билдирди.

Буга чейин юристтер маалымат жыйын өткөрүп, анда милиция кызматкерлери маркумдун сөөгүн казып, аны белгисиз тарапка алып кеткенин айтышкан. 15-октябрда Ала-Бука районунун Сары-Талаа аймагында 76 жаштагы кемпир жерге берилген. Бирок жергиликтүү тургундар маркум христианчылыктын баптист агымын тутунуп келгенин жүйө келтирип, каршы чыгышкан. Туугандары сөөктү коңшу айылга көмүшкөн. Ал жактагылар да каршы болгондуктан сөөк бийлик өкүлдөрүнөн кийлигишүүсү менен жашыруун үчүнчү жолу көмүлгөн болчу. 

"Мындай маалыматтар (милициянын дарегине айтылган) чындыкка кошпойт. Андыктан аны төгүнгө чыгарабыз", — деп айтылат маалыматта.

ИИМ ошондой эле жергиликтүү тургундар маркумдун сөөгүн казып чыгаргандан кийин анын туугандары келбегенин билдирет. Себеби жергиликтүү бийлик өкүлдөрү аны ошол эле күнү башка жакка көмгөнү айтылган. Сөөк Ала-Бука районунун Балтагулов айыл аймагындагы Кара-Тоо деген жерге берилген.

"Мындай аракеттер адеп-ахлакка туура келбей турганы боюнча түшүндүрүү иштери жүргүзүлүп, аны жергиликтүү тургундар туура эле кабыл алышкан", — деп айтылат билдирүүдө.

Маркумдун сөөгүн кайта көмүү боюнча аракет Ала-Бука РИИБдин каттоо китебине жазылып, керектүү материалдар топтолгон соң ага юридикалык баа берүү үчүн прокуратурага жиберилет.