БИШКЕК, 21-окт. — Sputnik. Бактен облусунун 2016-жылдын 9 ай ичиндеги жыйынтыктар жана негизги милдеттер боюнча облустук коллегия өттү. Бул тууралуу өкмөттүн Баткен облусундагы өкүлчүлүгү билдирди.
Иш-чара өкмөттүн Баткен облусундагы ыйгарым укуктуу өкүлү Абиш Халмурзаев, район, шаар башчылары жана облусттук, райондук, мекеме ишканалардын жетекчилеринин катышуусу менен болду.
"Баткен облусу боюнча капиталдык курулуш башкармалыгы тарабынан 2016-жылга капиталдык салымдар боюнча республикалык бюджеттин эсебинен каржылануучу 17 социалдык объект курулуп, Жер-Үй кенинен түшкөн каражаттын эсебинен 17 долбоор аткарылды", — деп жазылат маалыматта.
Аймактар боюнча алып караганда 2016-жылдын январь-сентябрь айларында турак жай курулушунда жалпы аянты 36 миң 665 чарчы метрлик 354 батир пайдаланууга берилди.
Ал эми жалпы турак жай курулушуна сарпталган чыгым 413,4 млн. сомду түздү.
