БИШКЕК, 21-окт. — Sputnik. Билим берүү жана илим министрлигинде мектеп программасын жаңылоо боюнча жыйынтыктар талкууланганын аталган министрлик маалымдады.
Министр Эльвира Сариева белгилегендей, мектептерде бул өзгөртүүлөр этабы менен ишке ашып жатат.
"Алгач апробация аркылуу пилоттук мектептердеги өзүнчө класстарда, тактап айтканда, жаңы предметтик стандарттары, программалары, ошондой эле жаңы муундун китептери даяр болгон сабактардан башталат", — деди Сариева.
Ошондой эле министр учурда мектептерге беш күндүк окууну киргизүү боюнча министрликтин макулдашуу иштери аяктап, өкмөттүн чечими калганын белгиледи.
Иш-чаранын жүрүшүндө жаңы предметтик стандарттарга ылайык айрым сабактарды киргизүү, окуучулардын сабактарынын санын кыскартып, жүгүн жеңилдетүү боюнча маселелер талкууланды.
