БИШКЕК, 21-окт. — Sputnik. Эмил Курманалиевге болгон кол салуу кызматына байланышпайт. Бул тууралуу Башкы прокуратуранын маалымат кызматы билдирди.
Эске сала кетсек, Орто-Сай айылында 2016-жылдын 29-июль күнү эртең менен Башкы прокуратуранын кызматкери Эркин Курманалиевге кол салуу болуп, оор жаракат алган. Аталган кылмышка шектүү катары анын тууганы Төлөгөн Айтмырзаев кармалган. Анын үйүн тинтүү учурунда куралдар табылган.
"Эркин Курманалиевдин ата-энесине Төлөгөн Айтмырзаевдин ата-энеси 60 миң 500 доллар карыз болуп калган. Ошондон улам Курманалиев тууганын Башкы прокуратурага чакырып, карызын төлөбөсө кылмыш жоопкерчиликке тартарын айтып коркуткан. Андан соң Айтмырзаев өз үйүн Курманалиевдин апасына жаздырып берген. Бирок үй-бүлөсү турак жайсыз каларын ойлогон Айтмырзаев Курманалиевдин унаасына жардырылуучу зат койгон", — деп жазылат маалыматта.
Жогорудагы жагдайдан улам, Башкы прокуратура Курманалиевге кол салуу кызматына байланыштуу эмес болгонун баса белгилеп, анын Айтмырзаевди Башкы прокуратурага чакырып алып коркуткандыгы боюнча иликтөө башталганын кошумчалайт.
Ал эми кол салуу боюнча тергөө уланып жатат.
