БИШКЕК, 21-окт. — Sputnik. Нарын облусуна караштуу Кочкор районунда жашаган 30 жаштагы аял өзүнүн эки наристесин муунтуп өлтүрүүгө шектелип жатканын Ички иштер министрлигинен кабарлашты.
Билдирмеге караганда 16-октябрь күнү Кочкор райондук Ички иштер бөлүмүнө медицина кызматкерлери жергиликтүү тургундун үйүндө эки наристе өлгөнүн маалымдаган.
"Окуя болгон жерге ыкчам топ жетип барганда үч жана эки жаштагы наристелер каза болгону ырасталган. Кыздардын энеси түнкүсүн балдарына сасык тумоого каршы дары берип уктатканын, эртең менен каза болуп калганын көргөнүн билдирген", — деп айтылат маалыматта.
Бирок тергөө учурунда аял берген көрсөтмөсүн чаташтыра баштаган.
Аталган иш боюнча Кылмыш жаза кодексинин 97-беренеси (адам өлтүрүү) боюнча кылмыш иши козголуп, шектүү эки айга убактылуу кармоочу жайга киргизилди. Тергөө иштери аял психикалык жактан жабыркаган деп эч жерде катталбаганын көрсөткөн.
