БИШКЕК, 21-окт. — Sputnik. Бишкек шаарынын Кайгуул милициясынын мурунку жетекчиси Нурдин Насыркулов каяша айтканы үчүн кызматтан кеткен. Бул тууралуу ИИМ жетекчиси Кашкар Жунушалиев маалымат жыйын учурунда билдирди.
Буга чейин ЖМКларда Насыркулов ИИМдин орун басары Алмаз Орозалиев менен кайым айтышкандан кийин жумуштан алынганы айтылган.
"Насыркулов Бишкектеги Кайгуул милициясын жетектеп турганда бир топ кемчиликтер кеткен. Анын катасын айткан Орозалиевге каяша айткандыктан жумуштан алынды. Биз устав менен жашайбыз. Устав боюнча мага кайрылса болмок. Бирок каяша айтканы жарабайт", — деди министр.
Ал эми ИИМдин маалымат кызматы Насыркулов КМШнын саммити учурунда жетекчилик менен каяша айтышканын кошумчалады.
