АСТАНА, 21-окт. — Sputnik. Алия Самидин. Казакстан тараптын демилгеси менен кыргызстандык сүрөтчү Бузурманкул Мырзалиевдин сүрөт көргөзмөсү Астана шаарындагы Казакстан Улуттук сүрөт галереясында ачылды.
Сүрөтчүнүн айтымында, ал Казакстандагы алгачкы көргөзмөсүн эки элдин достук мамилелерине арнады.
"Казакстандагы алгачкы ирет ачылып жаткан көргөзмөнүКазакстандын эгемендүүлүгүнүн 25-жылдыгына жана кыргыз-казак достук мамилелерине арнадым. Анткени кыргыз-казак бир тууган", — деди ал.
Мырзалиев көргөзмөгө жыйырмага жакын сүрөт алып келгенин белгилеп, эмгектеринде Кыргызстандын кооз жаратылышын чагылдырганын айтты.
"Бул сүрөттөр аркылуу казак эли Кыргызстандын кооз жерлери менен таанышууга мүмкүнчүлүк алат деген ойдомун", — деди сүрөтчү.
Ал өз сөзүндө көп жылдардан бери сүрөт искусствосу менен спортту айкалыштырып жүргөнүн кошумчалап, көргөзмөнун катышуучуларына чыгыш күрөш өнөрүнөн атайын көнүгүүлөрдү аткарып берди.
Ал эми Улуттук сүрөт галереясынын экскурсия бөлүмүнүн башчысы Галия Бакирланова кыргыз сүрөтчүсүн казак эли жакшы кабыл алганын белгиледи.
Бакирланова улуттук сүрөт галереясында алгачкы жолу кыргыз сүрөтчүнүн көргөзмөсү уюштурулуп жатканын айтып, мындан ары казак сүрөтчүлөрүнүн көргөзмөлөру Кыргызстанда уюштурулаарын баса белгиледи.
Мырзалиев буга чейин Россия, Кытай жана башка өлкөлөрдө жеке сүрөт көргөзмөлөрүн уюштурган. Ал 200дөн ашуун сүрөттүн автору.
