БИШКЕК, 14-окт. — Sputnik. "Манас" эл аралык аэропортунан төрт шумкарды мыйзамсыз алып өтүүгө аракет кылган Бириккен Араб эмирлигинин эки жараны кармалды. Бул тууралуу Чек ара кызматы билдирди.
Маалыматка ылайык, аталган жарандар 14-октябрда колго түшүрүлгөн.
"Паспортту текшерүү учурунда чек арачылар Араб эмирлигинин эки жаранынын адаттан тыш кыймыл-аракетин байкашкан. Алардын документтери жайында болгону менен чек арачылар алардын өзүнө көз салууну чечкен", — деп айтылат маалыматта.
Кызматкерлер "Бишкек — Дубай" каттамы менен бара турган жүргүнчүлөр шымынын чөнтөгүнөн баштыкка бир нерселерди жан далбастап салып жатканын байкашкан. Учактын коштоочулары чек ара кызматын чакырган. Алардын жүктөрүн текшере келгенде канаттары жана буттары таңылган төрт шумкар чыккан.
"Сурак учурунда аталган жарандар шумкарларды шымдарынын сан жагына кошумча тигилген чөнтөктөргө салып алып өтүшкөнү белгилүү болду", — деп Чек ара кызматы билдирди.
Тийиштүү документтер түзүлгөндөн кийин алар УКМКнын Коррупцияга каршы күрөшүү кызматынын өкүлдөрүнө берилген.
