БИШКЕК, 9-окт. — Sputnik. АКШнын Республикалык партиясынын улуттук комитетинин юристтери президенттикке көргөзүлгөн талапкери Дональд Трампты алмаштыруу мүмкүнчүлүгүн карап жатат. Себеби, 2005-жылы тартылып алынган видеодо ал аялдарга карата осол сөздөрдү айткан. Бул тууралуу РИА Новости Politico басылмасына таянуу менен билдирди.
Ошентип АКШнын президенттигине талапкер Трамптын шайлоо алдындагы кампаниясы үзгүлтүккө учуроо коркунучунда турат.
Басылманын билдиришинче, талапкерлердин аты жазылган бюллетендер басылып чыкканын, айрым штаттарда мөөнөтүнөн мурда шайлоолор да болуп калганын эскертет.
"Учурда Республика партиясынын юристтери бюллетендеги эрежелерди тыкыр иликтеп жатат", — деп басылмага өздүк маалымат булактардын бирөө билдирген.
Ал ортодо юристтер Трампты алмаштырыш үчүн ал кызматташуусу керектигин айтышат.
"Талапкер шайлоого катышуудан баш тартканда же каза болуп калганда аны алмаштырууга болот. Азыр Трамп шайлоодон баш тартпай турганын айтты", – деп экинчи маалымат булак билдирген.
