Салянова "Вечерний Бишкек" гезити менен соттошмой болду

БИШКЕК, 7-окт. —Sputnik. "Ата Мекен" фракциясынын депутаты Аида Салянова эч бир ишкананын акционери болбогонун, анан калса "Альфа Телеком" (MegaCom соода маркасы) ЖАКына тийиштүү субъектилерге тийиштиги жоктугун жума күнү болгон брифингде билдирди.

Шаршемби күнү "Вечерний Бишкек" гезити эл өкүлдөрү Өмүрбек Текебаевдин, Аида Салянованын жана Алмамбет Шыкмаматовдун Максим Бакиевге таандык болгон оффшордук компанияларда үлүшү бар экенин жазып чыккан. Аты аталган депутаттар Southfield Management Inc. компаниясынын миноритардык акционерлери экени белгиленген. Материалдын авторунун белгилешинче депутаттар өз үлүштөрүн оффшордук компаниянын "Альфа Телеком" ишканасына болгон укуктарын калыбына келтирип бергени үчүн алган.

Салянованын айтымында, бул материал фракция мүчөлөрүн "каралоо" максатында жазылган. Эл өкүлү башкы прокурор болуп иштеп турганда MegaCom боюнча сот иши жүргөнүн айтты. Эгер сот "Альфа Телекомдун" 51 пайыз акциясын алууну мыйзамсыз деп тааныса, бул "Бимоком" ЖЧКсына өтүп кетмек. Башкача айтканда, мамлекетке эмес, жеке тараптарга кетип калмактыгын белгиледи.

"2012-жылдан тарта мен бул маселе менен тыгыз иштедим. Биз прокурорлор менен өлкөнүн кызыкчылыгын сотто коргогонбуз. Көп иштер аткарылып, анын арты менен 51 пайыз акция улутташтырылды", — деди Салянова.

Депутат компаниянын акцияларына же башка нерселерге кымындай да кызыгуусу болгон күндө да мындай жолго бармак эместигин айтты.

"Буга деле көз жуумп койсом болмок, бирок бир кезде анын баары билинип калмак деп кооптонмокмун", — деди эл өкүлү.

Ал ошондой эле гезитке жарыяланган материалда бир гана "атамекенчилердин" аттары аталганын айтып, аны саясатташтырылган деп баалап, мындан улам "Вечерний Бишкек" басылмасын сотко бере турганын белгиледи.