БИШКЕК, 7-окт. —Sputnik. Өкмөт Саламаттык сактоо министрлигинин Улуттук онкология жана Улуттук гематология борборлорун бириктирүү сунушун колдоого алганын өкмөттүн маалымат кызматы билдирди.
Аталган сунуш онкологиялык жана гематологиялык оорулууларга стационардык жана амбулатордук шарттарда адистештирилген көмөк көрсөтүүчү саламаттык сактоонун үчүнчү деңгээлдеги уюмдары экендигин эске алуу менен госпиталдык кызматты оптималдаштыруу жана рационалдаштыруу максатында киргизилген.
"Аталган борборлор дарылоо-диагностикалык, илимий-изилдөө жана окутуу-билим берүүчүлүк милдеттерди аткарат. Гемотологиялык оорулуулардын көпчүлүгү онкологиялык кызматтын милдетине жүктөлгөн. Клиникалык шартта онкология жана гемотология диагностика жана терапиялык методдорду иштеп чыгууда жалпылыктарга ээ болуп, химия терапиялык ыкмаларды колдонууда иммунотерапии, биологиялык изилдөө ыкмалары, магниттик-резонанстуу томография, биопсия менен байланышат", – деп айтылат маалыматта.
Өлкөдөгү онкологиялык кызматты жакшыртуу зарылдыгына көңүл буруп, өкмөт Саламаттык сактоо министрлигинин сунушун колдоп, кыска мөөнөт ичинде бирдиктүү онкогемотология борборун түзүү боюнча чечимдин долбоорун иштеп чыгууну жана киргизүүнү тапшырды.
