БИШКЕК, 5-окт. — Sputnik. Ош облусунун Кара-Суу районундагы "Кара-Суу" базарында салыкчы менен "Тазалык" муниципалдык ишканасынын кызматкери мушташканын Ош ОИИБдин маалымат кызматы билдирди.
"Шаршемби күнгө караган түнү бизге эки арыз келип түштү. Бирөөнү салык кызматында иштеген жаран жазса, экинчисин "Кара-Суу" базарын жыйнаган "Тазалык" ишканасынын кызматкери жазган. Экөө бири-бирин айыптап, денеге залал келтиргенин айтышууда", — деп Ош ОИИБдин маалымат катчысы Жеңиш Ашырбаев билдирди.
Азыр экөө тең ооруканада дарыланууда. Учурда сот медициналык экспертиза дайындалганын, анын жыйынтыгы менен кылмыш ишин козгоо, же козгобоо маселеси чечиле турганын милициядан маалымдашты.
Ал ортодо "Тазалыктын" кызматкери шейшемби күнү түндө аялы экөө базарды тазалап жүргөнүн айтат.
"Аялым менден 15 метрдей ары жакта болчу. Анын кыйкырганын угуп, чуркап бардым. Аны бейтааныш мас киши колунан кармап жетелеп баратканын көрдүм. Биз мушташа кеттик. Андан кийин ал тааныштарына чалды. Төрт киши келип, мени сабап кетти. Базардын күзөтчүлөрү окуяны жөн гана карап турушту. Милиция келип бизди РИИБге алып кетти. Ал жактан мен түшүнүк кат жазып, андан соң ооруканага келдим", — дейт "Тазалыктын" кызматкери Эркин Алмакеев.
Райондук прокуратурага Эркиндин агасы арыз жазган.
Кара-Суу райондук ооруканасынын травматология бөлүмүнүн дарыгери Нурбек Рыспаевдин айтымында, Эркин Алмакеевдин абалы оор. Анын бети төрт жеринен тигилген. Учурда медициналык текшерүүдөн өтүп, керектүү жардамдар берилүүдө.
Эркин Алмакеев "Тазалык" ишканасына 2016-жылдын июль айында орношкон.
"Тазалык" ишканасынын кызматкеринин үстүнөн арыз жазган Ариет М. аттуу жаран чынында салык кызматында иштейт.
"Анын айтымында, ал арак ичип, үйүнө кайтып келе жатып, көчөдөн аялды көргөн. Ага түн ортосунда аны ким көчөгө коё берген деп кыйкырган. Бир аздан кийин эле чоочун киши чуркап чыгып аны сабап баштады", — деп айтканын Ош ОИИБдин маалымат кызматы маалымдады.
Мушташкан эки жарандын тең канынан алкоголь табылганын эксперттер аныктаганын милициядан кошумчалады.
