БИШКЕК, 5-окт. — Sputnik. Бүгүн Ош шаарынын борбордук аянтында түштүк борбордун 3016 жылдыгын белгилөө салтанаты башталып, анда 500 комузчу "Маш ботойду" аткарды.
Майрамдык салтанатка биринчи вице-премьер-министр Мухамметкалый Абулгазиев, Жогорку Кеңештин депутаттары Абдувахаб Нурбаев, Айнуру Алтыбаева жана калаа башчысы Айтмамат Кадырбаев баштаган жергиликтүү бийлик өкүлдөрү катышты.
Абулгазиев берекелүү Ош шаары гүлдөп өнүгө берсин деген каалоо тилегин айтты. Ал эми калаа башчысы Айтмамат Кадырбаев шаардыктарды, жалпы эле кыргызстандыктарды Ош шаарынын күнү менен куттуктап, өлкөдө тынчтык, улуттар ынтымагы орун ала беришине тилектештигин билдирди.
Майрамдык иш-чара алгач калаадагы кызматтардын окуу жайлардын өкүлдөрүнүн майрамдык жүрүшү менен башталды.
Шаар күнүндө 500 комузчу "Маш ботойду" аткарып, ал эми Кыргыз Эл артисти Саламат Садыкова, ырчы Темир Назаров, Съездбек Искеналиев Ош элин куттуктап, ыр тартуулашты.
Мындан сырткары, Кытайдын Ош шаарындагы консулу Сун Лициун жалпы шаардыктарды куттуктап, Кытай тараптан шаар мэрине Тез жардам унаасынын ачкычын тапшырды.
