БИШКЕК, 1-окт. — Sputnik. Борбордук "Айчүрөк" дүр-дүйнө дүкөнүн түндүк тарабындагы базарда соода кылгандар бүгүн нааразычылыкка чыгып, администрацияга эки талап коюшту.
Алар аталган соода борбордун жанына түшө турган жаңы корпустан улам базардын жабылышына каршы болуп, башка жактан соода кылганга орун менен камсыздоону берүүнү же компенсация төлөп берүүнү талап кылышууда.
Буга чейин "Айчүрөк" дүр-дүйнө дүкөнүнүн башкы директору Михаил Михин октябрдан тарта аталган жайды кеңейтүү башталарын айткан. Ал үчүн ЦУМдун жанындагы чакан базарды жылдыруу керектигин кошумчалаган.
Нааразы болгондор аталган жайдын жабылышы боюнча билдирүү мындан 2-3 ай мурда келгендигин, бирок, олуттуу маанайда эмес болучу деген пикирин билдиришти.
"Алар бизге 2-3 ай мурда айткан, бирок, олуттуу деле маанайда билдиришкен эмес. Эми 3 күндүн ичинде чыгып кеткиле деп айтып жатышат. Азыр биз кайда барабыз? Соода кылган контейнерлерибизди 4 миң доллардан алганбыз, көптөрүбүздүн кредиттерибиз бар", — деди Букарова.
Сатуучулар бийлик же аталган жайдын администрациясына эки талапты коюп жатышат.
"Бизге же компенсация төлөшсүн же башка жактан соода кыла турган жай таап беришсин. Ал эми башка жактан сунуштаган жайларынын бир чарчы метри эле 25-40 доллар экен. Биз аны кантип төлөйбүз.",— деп кошумчалады Букарова.
Букарова алар сунуштай турган 5-кабатка барбай тургандыктарын, себеби, ал жакта соода жакшы жүрбөстүгүн айтты.
Чогулгандар дүйшөмбү күнү чогулаарын айтып, тарап кетишти.
