БИШКЕК, 27-сен. — Sputnik. 19 жаштагы Бегимай Назарова Рrincess of the Globe/Universe & Рhotomodel of the Universe – 2016 эл аралык деңгээлдеги кадыр-барктуу конкурста Кыргызстандын атынан катышат. Бул тууралуу конкурстун Facebook социалдык тармагындагы расмий баракчасында жарыяланды.
Дүйнөнүн 24 мамлекетинен келген сулуулар Түркиянын Бодрум шаарында сулуулук, назиктик, акылгөйлүк боюнча таймашат. Конкурстун финалы 4-октябрда Titanic Deluxe Bodrum мейманканасында өтөт.
Дүйнөлүк конкурстун уюштуруучулары катышуучуларды социалдык тармактагы активдүүлүгүнө карап тандашат. Назарованы Кыргызстандагы Instagram социалдык тармагын колдонуучулардын арасынан көрүп, чакырышкан.
Бегимай Назарова Кыргыз мамлекеттик юридикалык академиясында акыркы курста окуйт. Хореография менен алектенип, кайрымдуулук уюмдарында ыктыярчы да болуп иштейт.
